صميم العبدين

عبد الله وعبد الرحمن

Thursday, May 31, 2007

يوميات عبد الله في الحضانه


بعد ما تميت سنتين لقيت بابا وماما بتكلموا كده ومناقشات ومداولات وكأن اجتماع للامم المتحده وراحوا مقررين وبصوت عالي
عبد الله بكره انت هتروح الحضانه
انا فوجئت بالقرار مع اني طيب وهادي ومطيع ومش بعمل حاجه خالص المهم بابا بيصحيني الصبح معاه وهو نازل رايح الشغل وبتكون ماما صاحيه وبتعمل لي سندوتشات وبأخد معايا كيكه وزمزميه صغيره كده وبحطهم في شنطه ضهري اللي علي شكل قطه وبنزل مع بابا بدري جدا ايوه شويه بقعد أمثل علي بابا وماما اني عايز انام وما يمنعش شويه عياط كده يمكن يسيبوني انام لكن ايه ماما دي عندها الحضانه دي ايه؟ بس بصراحه الحضانه جميله وفيها كمبيوتر وكمان مراجيح واولادوبنات زي كده بلعب فيها لعب لما بقول يا بس وكمان بقيت احب امسك كشكول وقلم وأكتب وبقلد بابا وماما وهما بيكتبوا
يالا بقي علشان الحق انام علشان عندي حضانه الصبح ادعوا ان بابا وماما تروح عليهم نومه ومش اروح الحضانه بس رايح رايح مفيش نقاش

20 Comments:

  • At 12:15 PM , Blogger شــهــروزة said...

    This comment has been removed by the author.

     
  • At 12:17 PM , Blogger شــهــروزة said...

    يا جماالووو
    كبرنا خلاص وحنخوض غمار الحياة؟؟

    خللى بالك يا بيدو
    الحضانة هى أول خطوة فى غمار ومعارك الحياة يا ولدي

    ربنا يقويك


    هات حتة كيكة

     
  • At 2:45 PM , Blogger نبض اسكندرية said...

    يا خلاشى يا ناس

    على الواد العسل دة

    اخر اجراااااااااااااااااااام

    عموما معلش يابيدو

    كلنا عدينا بالمراحل دى وايام المدارس بقة

    والبسكويت اللوكس دة فى الحضانة حاجة اساسية

    ومتنساش تاكل كل السندوتشات

    سلام يا عثل

     
  • At 4:46 PM , Blogger Dananeer said...

    ايه العسل ده

    و بعدين انا منه طالما فيها صحيان بدرى اعيط

    فيه هناك الوان و رسم يا عمو؟؟

     
  • At 12:57 PM , Blogger رينـــــــــــا said...

    يااااااااااااااااااااااا
    انت فااااااااااااكر من ايام الحضانه
    دا انت قلبك.....
    '
    '
    '
    '
    '
    '
    '
    'ابيض اوى:D:D:D:D:D

    مدونه جمييييييييله
    اول زيارة
    وان شاء الله دائمه

     
  • At 7:05 PM , Anonymous عمتو ام عهد said...

    الف مليون مبروك يانور عيون عمتو ويارب عقبال الجامعه ياقلبى بس خلى بالك كل اللبط دة مش هيدخل على ماما هتروح يعنى هتروح وبعدين الحضانه بتاعتك اخر شخلعه يابودى انا هبعت عهد تروح معاك بس تخلى بالك منها ماشى بوسلى ماما وبابا كتييييييييييييييير ونفسك اكتتتتتتتتتتر واكتتتتتتتتتتتتتتر
    عمتو نيرمين

     
  • At 6:20 AM , Anonymous أيامنا الحلوة said...

    ياخلاصي ياناس على العسل .. ما شاء الله لاقوة الا بالله ربنا يحفظ ياعبد الله يارب .. وتنجح في كي جي وان قولوا امييييييييييييين

    تحياتي على البوست الرائع ده

     
  • At 2:27 PM , Blogger ضـوء الـقـمر said...

    مش هستغنا عن اني اتعزم في حفلة التخرج من الحضانة ان شاء الله يا عبد الله اتفقنا ؟
    مبروك يا جميل الحضانة ولازم ترجع تحكلنا يوم بيوم ايه اللي حصل

     
  • At 3:23 PM , Anonymous خالتوهمسة said...

    اللةعليك يابودى ومامابتصحيك الصبح بتكون كسلان واول متلبس وتفطر الوتش
    الى هوا السندوتش و تجري علي الحضانه
    وبعد ين تبوس ماما وتنزل وبعدالضهر انزل اجيبك ويا خساره انا همشي وابقي شوف مين يجيبك من الحضانه

     
  • At 3:48 AM , Blogger ذو النون المصري said...

    ربنا يبارك لك فيه
    طفلك جميل جدا
    و خليه ينام يوم او يومين عن الحضانه
    مش كل يوم حضانه حضانه
    خفف عنه شويه ليزهق
    تحياتي

     
  • At 1:54 AM , Blogger نورهان مفيد said...

    الف مبروك ياقلبي علي الحضانة ويارب عبال الابتدائي مش هقول الجامعة مرة واحدة عشان عايزة عيني تشبع منك في كل مرحلةمن حياتك
    واعيش معاك كل سنة من عمرك يا حبيب قلبي

    وشد حيلك انا عايزاك تبقي طيار كبير هتقولي اشمعنة طيار هقولك معرفش شكلك كده طيار

    ربنا يحميك ياقلبي ويخليك لبابا وماما ولينا وتفرحنا العمركله ياااارب
    وتكون من الصالحين ان شاء الله

     
  • At 3:36 AM , Blogger أبو أمل said...

    ياعم عبدالله
    مبروك يا عم
    وعوزين خبرتك عشان البنت امل تستفيد من خبراتك الفظيعة دى
    شكلى هانزل بمدونة أمل

     
  • At 10:07 AM , Blogger rasha said...

    معلش يا عبد الله اكيد عندك يوم او اتنين اجازه استحمل يا بطل

     
  • At 11:32 AM , Blogger shaimaa said...

    اوعى حد ياخد الساندوتشات منك

     
  • At 2:58 AM , Anonymous nahla said...

    هتروح هتروح
    غلبت محمد صبحي في يوميات ونيس
    مبروك وعقبل ماتروح الجامعة ياروح قلبي وبلاش البلطجة بتاعتك دى ف الحضانة وكفاية أحنا مستحملين شد حيلك ف المذاكرة بقي

     
  • At 8:03 PM , Blogger ابراهيم عز الدين said...

    الف مبروووووووووووووووووك
    علي الحضانة
    وانصحك تبعد عن حوار عايز انام وشوف حوار تاني احسن من كده
    والف مبروك تاني

     
  • At 10:46 AM , Blogger Nouran said...

    ايه يا عم المذاكرة ديه مقطعة بعضها اوي كده اكيد فيه اجازة استحمل يا بني عقبال ما نشوفك مهندس قد الدنيا

     
  • At 2:23 PM , Blogger Dody said...

    ماشاء الله مبرووووووك على الحضانه يا جميل
    وعقبال ما نشوفك فى ثانويه عامه وتطلع طيار زى ما عمتو نورهان قالت

     
  • At 9:02 AM , Blogger mo'men mohamed said...

    طب كويس انك دخلت الحضانه
    أخدت ايه النهارده ؟؟؟؟
    السلام عليكم

     
  • At 5:25 AM , Blogger Monzer said...

    يا عبد الله الحضانة مختلطة
    ولاد وبنات وحاجات كده
    زمانك مقطع السمكة وديلها
    عارف أنا الحركات بتاعة الشابا ده
    ربنايرجع بابا بالسلامة

     

Post a Comment

Subscribe to Post Comments [Atom]

<< Home